“倪个无(女每)真真讨气，勿是我要说俚！有来浪洋钱，拨来姘头借得去；自家要用着哉，再搭我讨。说说俚假痴假呆，随便耐骂俚打俚，俚隔两日忘记脱仔，原实概。我也同俚无那哈个哉！”子富道：“俚姘头是啥人？”翠凤道：“算算俚姘头，倒无数目囗！老姘头（要勿）去说俚哉，就故歇姘个也好几个来浪。耐看俚年纪末大，阿有啥一点点清头嗄？”子富道：“小房间里有个老老头，阿是俚姘头？”翠凤道：“老老头是裁缝张司务，陆里是姘头？故歇就为仔拨俚裁缝帐，凑勿齐哉。”子富微笑丢开，闲谈一会。赵家(女每)搬上晚餐，子富说已吃过。翠凤乃喊妹子黄金凤来同吃。
    晚餐未毕，只听得楼下外场喊道：“大先生出局。”翠凤高声问：“陆里搭？”外场说：“后马路。”翠凤应说：“来个。”