于是吃饭揩面，收抬散坐。吴雪香立时催葛仲英回去。仲英道：“歇一歇囗。”雪香道：“歇啥嗄，倪勿要。”仲英道：“耐勿要，先去末哉。”雪香瞪着眼问道：“阿是耐勿去？”仲英只是笑，不动身。雪香使性子，立起来一手指着仲英脸上道：“耐晚歇来末，当心点！”又转身向王莲生说：“王老爷来啊。”又说：“蕙贞阿哥，倪搭来白相相囗。”张蕙贞答应，赶着去送，雪香已下楼了。
    蕙贞回房，望葛仲英嗤的一笑。仲英自觉没趣，局促不安。倒是王莲生说道：“耐请过去罢，贵相好有点勿舒齐哉。”仲英道：“耐瞎说！管俚舒齐勿舒齐。”莲生道：“耐（要勿）实概囗。俚教耐过去，总是搭耐要好，耐就依仔俚也蛮好（口宛）。”仲英听说，方才起身。莲生拱拱手道：“晚歇请耐早点。”仲英乃一笑告辞而去。